உள்ளூராட்சி மன்றத் தேர்தலுக்கான வாக்குச்சீட்டுகளை அச்சிடும் பணிகள் காலவரையறையின்றி பிற்போடப்பட்டுள்ளன.
தேர்தலை நடத்தும் திகதி தொடர்பில் ஏற்பட்டுள்ள சிக்கல் நிலைமை மற்றும் வாக்குச்சீட்டுகளை அச்சிடுவதற்கு தேவையான வசதிகள் கிடைக்காத காரணத்தால் இந்த தீர்மானம் எடுக்கப்பட்டுள்ளது என்று அரச அச்சகம் தெரிவித்துள்ளது.
இதுவரை அச்சிடப்பட்ட வாக்குச்சீட்டுகள் மிகவும் பாதுகாப்பாக வைக்கப்பட்டுள்ளன என்று அரச அச்சகம் குறிப்பிட்டுள்ளது.
தேர்லுக்கான வாக்குச்சீட்டுகளை அச்சிடுவதற்குத் தேவையான பொலிஸ் பாதுகாப்பு கிடைக்காமை, வாக்குச்சீட்டு அச்சிடுவதற்கு தேவையான பணம் கிடைக்காமை போன்ற காரணிகளால், அண்மை நாள்களில் வாக்குச்சீட்டுகளை அச்சிடும் பணிகளுக்கு தடை ஏற்பட்டிருந்தது.
தேவையான அனைத்து வசதிகளும் கிடைக்குமாயின் 25 முதல் 30 நாள்களுக்குள் அனைத்து வாக்குச்சீட்டுகளையும் அச்சடிக்கும் இயலுமை தமது நிறுவனத்துக்கு உள்ளது என்றும் அரச அச்சகம் சுட்டிக்காட்டியுள்ளது.