கல்வி, உயர் கல்வித் துறைகளில் பரீட்சை எழுதிய மாணவர்கள் தமது பரீட்சை விடைத்தாள்களைப் பார்ப்பதற்கான உரிமை.2026 மே 09 ஆம் திகதி, இலங்கை மேன்முறையீட்டு நீதிமன்றம் வழங்கிய முக்கியமான தீர்ப்பு, இலங்கையின் கல்வி மற்றும் உயர்கல்வி துறையில் புதிய சட்ட முன்னுதாரணமாக பார்க்கப்படுகிறது.
இந்தத் தீர்ப்பின் மூலம், பரீட்சார்த்திகள் தாங்கள் எழுதிய பரீட்சைகளின் மதிப்பீடு செய்யப்பட்ட விடைத்தாள்களை பார்வையிடவும், அவற்றின் நகல்களைப் பெறவும் சட்டப்பூர்வ உரிமை உடையவர்கள் என நீதிமன்றம் உறுதிப்படுத்தியுள்ளது.
இந்த வழக்கு, இலங்கை திறந்த பல்கலைக்கழகம் நடத்திய சட்டப்படிப்பு நுழைவுத் தேர்வை அடிப்படையாகக் கொண்டது. அந்தப் பரீட்சையில் தோற்றிய மாணவர் ஒருவர், தகவலறியும் உரிமைச் சட்டத்தின் கீழ் தனது மதிப்பீடு செய்யப்பட்ட விடைத்தாள்களை, வழங்கப்பட்ட மதிப்பெண்களை மதிப்பீட்டு தொடர்பான தகவல்களை
பெறக் கோரினார்.ஆனால், பல்கலைக்கழகம் அந்தத் தகவல்களை வழங்க மறுத்தது.
பல்கலைக்கழகத்தின் தரப்பில் முன்வைக்கப்பட்ட முக்கிய வாதம் என்னவென்றால், மதிப்பீடு செய்யப்பட்ட விடைத்தாள்களை வெளியிடுவது பரீட்சை முறையின் இரகசியத்தன்மையை மற்றும் நம்பகத்தன்மையை பாதிக்கும், அத்துடன் மதிப்பீட்டாளர்களின் சுதந்திரம் பாதிக்கப்படும், பரீட்சை நிர்வாகத்தில் சிக்கல்கள் உருவாகும், எதிர்கால மதிப்பீட்டு முறைமைகள் பாதிக்கப்படலாம் என்றும் வாதிடப்பட்டது.
ஆனால் மேன்முறையீட்டு நீதிமன்றம் இந்த வாதங்களை நிராகரித்தது.
நீதிமன்றம் வலியுறுத்திய முக்கிய அம்சங்கள்:
1. பல்கலைக்கழகங்கள் “பொது அதிகார அமைப்புகள்” அரசுப் பல்கலைக்கழகங்கள் மக்களின் வரிப்பணத்தில் இயங்குவதால், அவை பொது பொறுப்புக்கூறலுக்கு உட்பட்டவை.
2. மாணவரின் மதிப்பீடு அவருக்குரிய தகவல்.
ஒரு மாணவரின் விடைத்தாள் என்பது அவரைச் சார்ந்த தனிப்பட்ட கல்வி ஆவணம் ஆகும். எனவே, அதை முழுமையாக மறைப்பது நியாயமற்றது.
3. இயற்கை நீதி ஒருவர் ஏன் தோல்வியடைந்தார்?
ஏன் குறைந்த மதிப்பெண் கிடைத்தது?
மதிப்பீட்டில் பிழை ஏற்பட்டதா?
என்பதை அறியும் உரிமை கொண்டவர்.
4. வெளிப்படைத்தன்மை. நம்பிக்கையை உருவாக்கும்
மறைக்கப்பட்ட மதிப்பீட்டு முறைமையல்ல, ஆய்வுக்கு திறந்த அமைப்பே கல்வித் தரத்தையும் பொது நம்பிக்கையையும் வலுப்படுத்தும் என நீதிமன்றம் குறிப்பிட்டது.
வழக்கின் சட்ட முக்கியத்துவம்
இந்தத் தீர்ப்பு பல முக்கிய சட்டக் கோட்பாடுகளை வலுப்படுத்துகிறது:
– அரசு நிறுவனங்களின் முடிவுகள் கேள்விக்குட்படலாம்.
– RTI சட்டத்தின் பயன்பாடு கல்வித் துறைக்கும் தெளிவாக விரிவடைந்துள்ளது.
– மாணவர்கள் நியாயமான மற்றும் சரிபார்க்கக்கூடிய மதிப்பீட்டை எதிர்பார்க்கலாம்.
– பல்கலைக்கழகங்களும் நீதித்துறை கண்காணிப்பிற்குட்பட்டவை.
இந்தத் தீர்ப்பு எதிர்காலத்தில்,
மறுஆய்வு நடைமுறைகளை வலுப்படுத்தலாம்
அரசுப் பரீட்சை முறைமைகளில் வெளிப்படைத்தன்மையை அதிகரிக்கலாம். மருத்துவம், சட்டம், பல்கலைக்கழக நுழைவுத் தேர்வுகள் போன்ற துறைகளில் மாணவர் உரிமை விவாதங்களை உருவாக்கலாம்.கல்வி நிர்வாகத்தில் பொறுப்புணர்வை அதிகரிக்கலாம்
என எதிர்பார்க்கப்படுகிறது.
இந்த வரலாற்றுச் சிறப்புமிக்க தீர்ப்பை Dr. சுமுது பிரேமச்சந்திர, R. குருசிங்க ஆகிய நீதிபதிகள் வழங்கினர்.
இந்தத் தீர்ப்பு காரணமாக, பல கல்வி நிறுவனங்களில் மாணவர்கள் மீது இடம்பெற்று வந்ததாகக் குற்றஞ்சாட்டப்பட்ட,
– அதிகார துஸ்பிரயோகம்
– பழிவாங்கும் மதிப்பீடுகள்
– பாரபட்சமான திருத்தங்கள்
– வெளிப்படையற்ற மதிப்பெண் வழங்கல்.
– நிர்வாக அடக்குமுறைகள்
போன்ற செயல்பாடுகள் எதிர்காலத்தில் கேள்விக்குட்படுத்தப்படும்.
இந்தத் தீர்ப்பு, “மதிப்பீடு என்பது ஆய்வுக்கு அப்பாற்பட்ட இரகசிய அதிகாரம் அல்ல” என்ற முக்கியமான சட்டச் செய்தியை வழங்குகிறது.
இதன் மூலம்,மாணவர்கள் தங்களது மதிப்பீட்டை ஆய்வு செய்ய முடியும்.
தவறான மதிப்பெண்களை சவாலுக்கு உட்படுத்த முடியும். மதிப்பீட்டாளர்கள் கூடுதல் கவனத்துடனும் நியாயத்துடனும் செயல்பட வேண்டிய நிலை உருவாகும்.
இது வெறும் ஒரு சட்டத் தீர்ப்பு அல்ல,
“மாணவர் அமைதியாக சகிக்க வேண்டிய காலம் மாறுகிறது” என்ற ஜனநாயக மற்றும் கல்வி உரிமைச் செய்தியையும் வெளிப்படுத்துகிறது.