இந்தியாவின் முன்னாள் பிரதமர் ராஜீவ் காந்தி கொலை வழக்கில் ஆயுள் தண்டனை பெற்ற 7 பேரில் ஒருவர் சாந்தன். இலங்கையைப் பூர்வீகமாகக் கொண்டவர். ராஜீவ் காந்தி கொலை வழக்கில் சிறைத் தண்டனை பெற்று வேலூர் மத்திய சிறையில் அடைக்கப்பட்டிருந்தார் சாந்தன். கடந்த 2022 ஆம் ஆண்டு உச்ச நீதிமன்ற அறிவுறுத்தலின்படி விடுதலை செய்யப்பட்டார்.
இதனைத் தொடர்ந்து சாந்தன் திருச்சியிலுள்ள சிறப்பு முகாமில் தடுத்து வைக்கப்பட்டிருந்தார். இந்நிலையில் கடந்த ஜனவரி மாதம் அவர் உடல்நலக் குறைவால் பாதிக்கப்பட்டார். திருச்சி அரசு மருத்துவமனையில் சிகிச்சை பெற்றுவந்த சாந்தன் பின்னர் கடந்த ஜனவரி மாதம் முதல் உயர் சிகிச்சைக்காக சென்னை ராஜீவ் காந்தி அரசு பொது மருத்துவமனையில் சேர்க்கப்பட்டார்.
கல்லீரல் செயலிழப்பால் பாதிக்கப்பட்ட சாந்தனுக்கு ராஜீவ் காந்தி அரசு மருத்துவமனையில் சிகிச்சை வழங்கப்பட்டு வந்தது. இந்நிலையில் இன்று அதிகாலை மாரடைப்பு காரணமாக சாந்தனின் உயிர் பிரிந்தது. இதனை சென்னை ராஜீவ் காந்தி அரசு மருத்துவமனை நிர்வாகம் உறுதி செய்தது. சாந்தன் மறைவை உறுதிப்படுத்தியுள்ள ராஜீவ் காந்தி அரசு மருத்துவமனை முதல்வர் தேரணி ராஜன், திருச்சி மாவட்ட ஆட்சியரின் பரிந்துரையின் பேரில் சென்னை ராஜீவ் காந்தி அரசு பொது மருத்துவமனையில் சாந்தன் உள்நோயாளியாக சேர்க்கப்பட்டிருந்ததாக தெரிவித்துள்ளார்.
கல்லீரல் செயலிழப்பு காரணமாக அவருக்கு கல்லீரல் சிகிச்சை பிரிவில் தீவிர சிகிச்சை அளிக்கப்பட்டு வந்தது என்றும் அவருக்கு கல்லீரல் செயலிழப்பு ஏற்படுவதற்கான காரணத்தை அறிந்து கொள்வதற்காக பயாப்சி சோதனை மேற்கொள்ள முயன்றபோது சாந்தன் அதற்கு மறுப்பு தெரிவித்ததாகவும் கூறியுள்ளார். கிரிப்டோஜெனிக் சிரோசிஸ் பாதிப்பால் சாந்தன், சில சமயங்களில் சுயநினைவை இழந்து பின்னர் இயல்பு நிலைக்குத் திரும்புவார் என்றும் தெரிவித்துள்ளார்.
இதன் காரணமாக தீவிர கண்காணிப்பில் இருந்த சாந்தனுக்கு நேற்று இரவு உடல் நிலையில் பின்னடைவு ஏற்பட்டு மீண்டும் சுயநினைவை இழந்தார் என்றும் தெரிவித்துள்ளார். செயற்கை சுவாசம் பொருத்தி மருத்துவர்கள் சிகிச்சை அளித்த நிலையில், இன்று அதிகாலை அவருக்கு மாரடைப்பு ஏற்பட்டதாகவும் தொடர்ந்து சி.பி.ஆர். சிகிச்சை மேற்கொள்ளப்பட்டும் சிகிச்சை பலனின்றி அவர் உயிர் பிரிந்ததாக தெரிவித்துள்ளார்.
வேலூர் மத்திய சிறையில் இருந்து விடுவிக்கப்பட்டு திருச்சி சிறப்பு முகாமில் இருந்த சாந்தனை இலங்கைக்கு அனுப்பி வைக்குமாறு அவரது தயார் மகேஸ்வரி கடந்த ஆண்டு இந்திய தலைமை அமைச்சர் நரேந்திர மோடிக்கு வேண்டுகோள் விடுத்திருந்தார்.
இதையடுத்து சாந்தன் நாடு திரும்ப மத்திய அரசு அண்மையில் அனுமதி வழங்கியது. ஆனால், தாய் நாடு திரும்புவதற்கு முன்பே சாந்தனின் உயிர் பிரிந்தது பெரும் சோகத்தை ஏற்படுத்தியுள்ளது.