பழக்கடை வியாபாரி ஒருவரைக் கடத்திச் சென்று உடைகளைக் களைந்து தாக்குதல் நடத்தினார்கள் என்ற குற்றச்சாட்டில் நான்கு இளைஞர்கள் யாழ்ப்பாணம் மாவட்டக் குற்றத் தடுப்புப் பிரிவுப் பொலிஸாரால் கைது செய்யப்பட்டுள்ளனர்.
நேற்று(ஜூன் 30) பகல் யாழ்ப்பாணம் நகர பழக்கடையில் வியாபாரத்தில் ஈடுபட்டிருந்த வியாபாரி ஒருவர் உந்துருளியில் வந்த இருவரால் இழுத்து ஏற்றி கடத்திச் செல்லப்பட்டார்.
அவரை கடத்திச் சென்றவர்கள் உள்ளாடையுடன் வைத்து கடுமையாகத் தாக்கி அதைக் காணொலியாகப் பதிவு செய்துள்ளனர். அதன்பின்னர் அவர்கள் தப்பிச் சென்றுள்ளனர்.
இந்தச் சம்பவம் தொடர்பில் தாக்குதலுக்குள்ளான பழக்கடை வியாபாரியால் பொலிஸில் முறைப்பாடு செய்யப்பட்டது.
இந்தச் சம்பவம் தொடர்பாக யாழ்ப்பாணம் பிராந்திய மூத்த பொலிஸ் அத்தியட்சகர் ஜெகத் விசாந்தவின் கீழ் பதில் பொறுப்பதிகாரி உப பொலிஸ் பரிசோதகர் பிரதீப் தலைமையில் இயங்கும் யாழ்ப்பாணம் மாவட்ட குற்றத்தடுப்பு பொலிஸார் விசாரணைகளை முன்னெடுத்தனர்.
முறைப்பாடு கிடைத்த சில மணி நேரங்களிலேயே பழக்கடை வியாபாரியை கடத்திச் சென்று தாக்குதல் நடத்திய நால்வரும் கைது செய்யப்பட்டனர்.
நல்லூர், அரசடியைச் சேர்ந்த 18, 20, 23 மற்றும் 24 வயதுடைய நால்வரே கைது செய்யப்பட்டுள்ளார். பழங்கள் வாங்கச் சென்ற இளம் பெண் ஒருவருடன் தகாத முறையில் உரையாடினார் என்றும், அதைத் தட்டிக்கேட்ட ஒருவரின் கழுத்தில் கத்தியை வைத்து மிரட்டினார் என்றும், அதனாலேயே அவர் மீது தாக்குதல் நடத்தப்பட்டது என்றும் சந்தேகநபர்கள் விசாரணையில் தெரிவித்துள்ளனர்.
சந்தேகநபர்கள் நீதிமன்றில் முற்படுத்தப்படுவர் என்றும், கடத்தலுக்குப் பயன்படுத்திய மோட்டார்சைக்கிள் மற்றும் கத்தி என்பன மீட்கப்பட்டுள்ளன என்றும் பொலிஸார் தெரிவித்தனர்.
