உத்தேச ஒழுங்கமைக்கப்பட்ட குற்றத் தடுப்புச் சட்டமூலத்தின் ஊடாக 72 மணித்தியால தடுப்புக்காவல் உத்தரவு காலத்தை திருத்தம் செய்வதற்கு தீர்மானித்துள்ளதாக ஜனாதிபதி அநுர குமார திசாநாயக்க தெரிவித்துள்ளார்.
நாடே ஒன்றாக தேசிய செயற்பாட்டு ஆன்மீக மாநாட்டில் கலந்து கொண்டு ஜனாதிபதி இந்த விடயத்தைக் குறிப்பிட்டுள்ளார்.
உத்தேச ஒழுங்கமைக்கப்பட்ட குற்றத் தடுப்புச் சட்டமூலத்தின் ஊடாக முன்மொழியப்பட்ட 72 மணிநேர தடுப்புக்காவல் காலத்தை 48 மணிநேரமாகக் குறைக்க வாய்ப்புள்ளது. மனித உரிமைக் குழுக்கள் எழுப்பிய கவலைகளைத் தொடர்ந்து, இந்தச் சட்டத்தில் உள்ள சர்ச்சைக்குரிய அம்சங்களை மாற்றியமைக்கத் தயாராக உள்ளோம்.
இந்தச் சட்ட முன்வரைவு குறித்து கவலை தெரிவித்துள்ள அமைப்புகளுடன் பேச்சுவார்த்தை நடத்த அரசாங்கம் தயாராக உள்ளது. சந்தேக நபர்களை 72 மணிநேரம் வரை தடுப்புக்காவலில் வைக்க அனுமதிக்கும் விதியை மாற்றியமைக்கத் நான் தயாராக இருக்கிறேன்.
ஒழுங்கமைக்கப்பட்ட குற்றங்களை ஒழிப்பதற்கான நடவடிக்கைகளின் செயல்திறனைப் பாதிப்படையச் செய்யாமல், அதே சமயம் முன்வைக்கப்பட்ட கவலைகளைக் கருத்தில் கொண்டு, இந்தக் கால அளவை 48 மணிநேரமாகக் குறைக்கலாம். மேலும், ஒழுங்கமைக்கப்பட்ட குற்றக் கும்பல்களை அடையாளம் காணப் பயன்படுத்தப்படும் குறியீடுகள் மற்றும் அடையாளங்கள் தொடர்பான சட்டப் பிரிவுகளை மறுபரிசீலனை செய்யவும், திருத்தவும் அரசாங்கம் தயாராக இருக்கிறது.
இதில், குற்றக் கும்பல்களை அடையாளம் காண உதவும் பச்சை குத்தல்கள் மற்றும் பிற உடல் அடையாளங்கள் குறித்த விதிகள் அடங்கும் இவை மனித உரிமை ஆர்வலர்கள் மற்றும் சிவில் சமூகக் குழுக்களின் விமர்சனத்திற்கு உள்ளாகியிருந்தன.
இருப்பினும், இத்தகைய திருத்தங்கள் முன்மொழியப்பட்டாலும், போதைப்பொருள் மற்றும் ஒழுங்கமைக்கப்பட்ட குற்றக் கும்பல்களால் நாட்டில் ஏற்பட்டுள்ள வளர்ந்து வரும் அச்சுறுத்தலைப் புறக்கணிக்க முடியாது என சுட்டிக்காட்டியுள்ளார்.
அத்துடன் இன்றைய இலங்கையில் மக்கள் எதிர்கொள்ளும் மிக முக்கியமான அச்சுறுத்தலாக போதைப்பொருள் பிரச்சினையை விவரித்த அவர், சமூகங்களை இந்த பிடியிலிருந்து விடுவிக்க ஒன்றிணைந்த தேசிய முயற்சி தேவை என்றும் அவர் அழைப்பு விடுத்துள்ளார்