வட்டுக்கோட்டை யாழ்ப்பாணக் கல்லூரிக்கும், யாழ்ப்பாணம் சென். பற்றிக்ஸ் கல்லூரிக்கும் இடையிலான ‘பொன் அணிகளின் போர்’ துடுப்பாட்டத் தொடரின் 106ஆவது ஆட்டம், வட்டுக்கோட்டை யாழ்ப்பாணக் கல்லூரி மைதானத்தில் நாளை(பெப்ரவரி 24), நாளைமறுதினம் (பெப்ரவரி 25) என இரு தினங்கள் இடம்பெறவுள்ளது.
இந்தத் தொடருக்கு எஸ்.எல்.ரி. மொபிட்டல் அனுசரணை வழங்குகின்றது. தொடருக்கான வீரர்கள் அறிமுக நிகழ்வும், கிண்ணத்தை அறிமுகம் செய்துவைக்கும் நிகழ்வும் வட்டுக்கோட்டை யாழ்ப்பாணக் கல்லூரியில் நேற்று இடம்பெற்றது.
கடந்த வருடம் நடைபெற்ற பொன் அணிகளின் போரில் யாழ்ப்பாணம் சென். பற்றிக்ஸ் கல்லூரி அணி வெற்றிபெற்றிருந்தது. இம்முறை சொந்த மைதானத்தில் களமிறங்குவதால் இந்தத் தோல்விக்குப் பதிலடி கொடுக்கும் முனைப்பில் வட்டுக்கோட்டை யாழ்ப்பாணக் கல்லூரி அணி களமிறங்குகின்றது.
இரு அணிகளுக்கும் இடையிலான ராஜன் கதிர்காமர் கிண்ணத்துக்கான ஆட்டம் (ஒருநாள் ஆட்டம்) மார்ச் 4 ஆம் திகதியும் ரி 20 ஆட்டம் மார்ச் 7ஆம் திகதியும் இடம்பெறவுள்ளமை குறிப்பிடத்தக்கது.
