இலங்கை நிழல் உலகையே ஆட்டிப்படைத்த ஒரு முக்கிய புள்ளி, பனி படர்ந்த கிழக்கு ஐரோப்பிய நாடான அசர்பைஜானில் சிக்கியுள்ளார்.
இலங்கையில் பல கொலைகள் மற்றும் போதைப்பொருள் கடத்தல் சம்பவங்களுடன் தொடர்புடைய ‘படுவத்தே சாமர’, பொலிஸாரின் கண்களில் மண்ணைத் தூவிவிட்டுத் தப்பினார். பெரும்பாலான குற்றவாளிகள் டுபாய்க்குத் தஞ்சமடையும் நிலையில், சாமர யாராலும் கண்டுபிடிக்க முடியாது என நினைத்து அசர்பைஜானில் தங்கியிருந்தார்
இலங்கை பொலிஸார் சர்வதேச பொலிஸார் மூலம் ‘சிவப்பு அறிவித்தல்’ விடுத்து சாமரவின் ஒவ்வொரு அசைவையும் ரகசியமாக மோப்பம் பிடித்த புலனாய்வுப் பிரிவினர், அவர் அசர்பைஜானில் இருப்பதை உறுதி செய்தனர்
கடந்த சில தினங்களுக்கு முன், அசர்பைஜான் தலைநகரில் சாமர சாதாரணமாக உலவிக்கொண்டிருந்தபோது, அந்நாட்டு விசேட பாதுகாப்புப் படையினர் மின்னல் வேகத்தில் அவரைச் சுற்றிவளைத்தனர். தான் ஒரு வெளிநாட்டுத் தொழிலதிபர் என அவர் நாடகமாடினாலும், டிஜிட்டல் கைரேகை அடையாளங்கள் மூலம் உறுதிசெய்யப்பட்டார்
கைது செய்யப்பட்ட சாமரவை அழைத்து வர இலங்கையிலிருந்து விசேட பொலிஸ் குழுவொன்று விரைந்தது. அசர்பைஜானில் இருந்து இந்தியா வழியாக நேற்று (10/05) இரவு 11:30 மணியளவில் கட்டுநாயக்க விமான நிலையத்திற்கு அவர் கொண்டு வரப்பட்டார்.
விமான நிலையமே பாதுகாப்புப் படையினரின் கட்டுப்பாட்டில் இருக்க, சாமரவை குற்றப்புலனாய்வுத் திணைக்களத்தினர் தங்களது ரகசிய விசாரணை அறைக்கு அழைத்துச் சென்றனர்.
சாமரவின் கைது, வெளிநாடுகளில் பதுங்கியிருக்கும் மற்றுமொரு முக்கிய குற்றவாளியான ‘ஹரக் கட்டா’வின் சகாக்களுக்கு ஒரு மரண அடியாகக் கருதப்படுகிறது. அடுத்தடுத்து பல ‘பெரிய தலைகள்’ சிக்கும் என எதிர்பார்க்கப்படுகிறது