திருநெல்வேலி பகுதியில் வயோதிப பெண்மணியை வீட்டின் அறையொன்றினுள் வைத்து பூட்டி விட்டு , வீட்டினுள் சல்லடை போட்டு தேடிய நபர் ஒருவரை ஊரவர்கள் மடக்கிப் பிடித்துள்ளனர்.
திருநெல்வேலியில் வயோதிப பெண்மணி வசிக்கும் வீடொன்றினுள் இன்றைய தினம் (ஏப்ரல் 25) காலை அத்துமீறி நுழைந்த நபர் ஒருவர், வீட்டில் இருந்த வயோதிபப் பெண்ணை வீட்டிலுள்ள அறை ஒன்றினுள் வைத்து பூட்டி விட்டு, வீட்டினுள் சல்லடை போட்டுத் தேடுதல் நடாத்தியுள்ளார்.
அறையினுள் பூட்டப்பட்டிருந்த பெண்மணி அபாய குரல் எழுப்பவே, அயலவர்கள் வீட்டிற்குச் சென்ற போது, வீட்டினுள் இருந்து நபர் ஒருவர் தப்பியோடியுள்ளார்.
அதனை அடுத்து வீட்டினுள் சென்று பார்த்த போது வயோதிபப் பெண் அறை ஒன்றினுள் வைத்து பூட்டப்பட்டிருப்பதனை அவதானித்து அறையை திறந்து அவரை காப்பாற்றியுள்ளனர்.
அதனையடுத்து, வீட்டிலிருந்து தப்பிச் சென்ற நபரை ஊரவர்கள் தேடி மடக்கிப் பிடித்து விசாரணைகளை மேற்கொண்ட போது, அந்த நபரிடம் 25000 ரூபா பணம் மற்றும் அவரது பையில், பித்தளைப் பொருட்கள் சிலவும் காணப்பட்டுள்ளன.
அதேவேளை குறித்த நபரிடம் தன்னை அடையாளப்படுத்த கூடிய எந்த ஆவணங்களும் இருக்கவில்லை.
அதனையடுத்து கோப்பாய் பொலிஸாருக்கு தகவல் வழங்கி, பொலிஸாரிடம் அந்நபரை ஒப்படைத்துள்ளனர். கோப்பாய் பொலிஸார் விசாரணைகளை முன்னெடுத்துள்ளனர்.
அதேவேளை கடந்த சனிக்கிழமை நெடுந்தீவு பகுதியில் வயோதிபர்கள் ஐவர் படுகொலை செய்யப்பட்டு , அவர்களின் நகைகள் கொள்ளையடிக்கப்பட்ட சம்பவம் அதிர்ச்சியை ஏற்படுத்தியுள்ள நிலையில் , இந்த சம்பவம் குறித்த வீட்டின் அருகில் வசிக்கும் அயலவர்கள் மத்தியில் மேலும் பயத்தினை ஏற்படுத்தியுள்ளது.
