நெடுந்தீவிலுள்ள வெடியரசன் கோட்டைக்கு அருகிலுள்ள தமிழ் பௌத்த எச்சத்தின் வரலாற்றை திரிவுபடுத்தி, இலங்கை கடற்படை தகவல் பதாகை நாட்டியுள்ளது. அங்கு நாட்டப்பட்டிருந்த தகவல் பதாகையை யாரோ அகற்றிவிட்டனர்.
யாழ்ப்பாணத்தில், தொல்பொருளியல் திணைக்களத்தின் பணிமனைகள் ஏதும் இல்லாத காரணத்தால் அறிவித்தல் பலகையை மீண்டும் அதே இடத்தில் வைக்குமாறு எமக்கு அறிவுறுத்தப்பட்டது என்று கடற்படை விளக்கம் கூறியுள்ளது.
வெடியரசன் கோட்டை 2007ஆம் ஆண்டு வர்த்தமானி மூலம் தொல்பொருள் சின்னமாக அடையாளப் படுத்தப்பட்டுள்ளது. அதற்கு அருகில் சுமார் 50 மீற்றர் தொலைவில் தமிழ் பௌத்தத்துக்கான எச்சங்கள் 3 இடங்களில் காணப்படுகின்றன. அவை 2011ஆம் ஆண்டு டிசெம்பர் மாதமே தொல்பொருள் சின்னங்களாக வர்த்தமானியிடப்பட்டன.
இந்த நிலையில் கடற்படையினரால், வெடியரசன் கோட்டைக்கு அருகிலுள்ள பௌத்த ஸ்தானத்துக்கு அண்மையாக சிங்களம் மற்றும் ஆங்கில மொழிகளில் தகவல் பதாகை, வைக்கப்பட்டுள்ளது. அதில் வரலாற்றை திரிவுபடுத்தும் விதமான தகவல்கள் காட்சிப்படுத்தப்பட்டுள்ளன.
‘சிங்கள பிராகிருத மொழி எழுத்து இங்கு உள்ளதாகவும், சிங்கள – பெளத்தத்துக்குரிய எச்சம் காணப்படுவதாகவும்’ அந்தத் தகவல் பதாகையில் குறிப்பிடப்பட்டுள்ளது.
ஆனால், அது தவறானது என்றும் வரலாற்றை திரிபுபடுத்துவதாகவும், முன்னாள் வரலாற்றுத்துறை பேராசிரியர் ப. புஸ்பரட்ணம் சுட்டுக்காட்டுகின்றார்.
‘அங்கு காணப்படுபவை 14 – 15ஆம் ஆண்டு நூற்றாண்டுக்குரிய தமிழ் மொழியில் எழுகப்பட்ட கல்வெட்டுக்கள். சில தமிழ்ச் சொற்களை எழுது வதற்கு கிரந்த எழுத்துக்களைப் பயன் படுத்தியிருக்கின்றார்கள். கல்வெட்டு மூலாதாரத்லிருந்து அங்கு எழுப்பப்பட்ட பௌத்த ஸ்தானம் தமிழருக்குரியது என்பது தெரிய வருகின்றது’ என்று பேராசிரியர் ப. புஸ்பரட்ணம் தெரிவிக்கின்றார்.
இதேவேளை- அங்கு வைக்கப்பட்ட தகவல் பதாகையை தொல்பொருள் திணைக்களமே நட்டுள்ளதாக முன் வைக்கப்படும் குற்றச்சாட்டுக்களை தொல்லியல் திணைக்களம் முற்றாக மறுத்துள்ளது.
நெடுந்தீவு பிரதேச செயலகம் மற்றும் பிரதேச சபை என்பனவும் அதனைத்தாம் வைக்கவில்லை என்று மறுத்துள்ளன.
இதற்கிடையில் இலங்கைக் கடற்படையினர், தாம் நட்டுள்ள அந்தத் தகவல் பலகையை அகற்ற வேண்டாம் என நெடுந்தீவு பிரதேச சபையிடம் கோரியுள்ளதாக தவிசாளர் நல்லதம்பி சசிக்குமார் தெரிவித்துள்ளார்.
முறையான அனுமதிக்கு விண்ணப்பிக்கும்போது, தகவல் பலகையிலுள்ள விடயங்கள் சரியானவையா என்று தொல்பொருள் திணைக்களத்திடம் உறுதிப்படுத்திய பின்னரே காட்சிப் படுத்த அனுமதிக்கப்படும் என்றும் அவர் குறிப்பிட்டார்.
இதேவேளை – கடற்படையின் பேச்சாளர் இணைய ஊடகம் ஒன்றுக்கு வழங்கிய நேர்காணலில்,
இலங்கை அரசாங்கத்தால் புராதன முக்கியத்துவம் வாய்ந்த இடமாக வர்த்தமானி அறிவித்தலில் மூலம் பிரகடனப்படுத்தப்பட்டிருக்கும் வெடியரசன் கோட்டையில், எந்த வொரு சட்டவிரோதமான நடவடிக்கைகளையும் கடற்படையால் முன்னெடுக்க முடியாது. வெடியரசன் கோட்டையில் ஏற்கெனவே வைக்கப்பட்டிருந்த அறிவித்தல் பலகை சில தரப்பினரால் அகற்றப்பட்டுள்ளது. அதனை யார் செய்தார்கள் என்று எனக்குத் தெரியாது.
யாழ்ப்பாணத்தில், தொல்பொருளியல் திணைக்களத்தின் பணிமனைகள் ஏதும் இல்லாத காரணத்தால் அறிவித்தல் பலகையை மீண்டும் அதே இடத்தில் வைக்குமாறு எமக்கு அறிவுறுத்தப்பட்டது. அதற்கேற்ப அறிவித்தல் பலகை வைக்கப்பட்டது. தற்போது சிங்கள மற்றும் ஆங்கில மொழிகளில் மாத்திரம் வைக்கப்பட்டிருக்கும் இந்த அறிவித்தல் பலகைகளை தமிழ் மொழியிலும் வைக்க ‘சம்பந்தப்பட்ட அதிகாரிகளுடன் கலந்துரையாடி தேவையான நடவடிக்கைகள் எடுக்கப்படும்.- என்று கூறியுள்ளார். (நனறி ஈழநாடு)
