யாழ் மாவட்டத்தின் சுற்றுலாத்துறைச் சேவையை வழங்கும் நிறுவனங்களை இலங்கை சுற்றுலா அபிவிருத்தி அதிகார சபையின் கீழ் பதிவு செய்தல் தொடர்பான விழிப்புணர்வு கலந்துரையாடல் கடந்த 28 ஆம் திகதி இடம்பெற்றது.
யாழ்ப்பாண மாவட்ட செயலகமும் வடக்கு மாகாண சுற்றுலாத்துறை பணியகமும் இணைந்து இலங்கை சுற்றுலா அபிவிருத்தி அதிகார சபையின் அனுசரணையுடன் இந்த விழிப்புணர்வு கலந்துரையாடல் முன்னெடுக்கப்பட்டது.
யாழ் மாவட்ட அரசாங்க அதிபர் அம்பலவாணர் சிவபாலசுந்தரன் அவர்களின் தலைமையில் மாவட்ட செயலக கேட்போர்கூடத்தில் நடைபெற்றது.
இக் கலந்துரையாடலில் யாழ் மாவட்டத்தில் சுற்றுலா துறையை மேம்படுத்தும் நோக்கில் சுற்றுலாத்துறைச்சேவை வழங்கும் நிறுவனங்களை பதிவு செய்தல், அதன் முக்கியத்துவம், எவ்வாறு பதிவு செய்வது, online மூலமாக எவ்வாறு பதிவுகளை மேற்கொள்வது, பதிவு செய்யப்பட்ட சுற்றுலா வியாபாரங்களுக்கான அனுகூலங்கள், பதிவு செய்யப்படாத சுற்றுலா வியாபாரங்களுக்கான சவால்கள் தொடர்பாக விழிப்புணர்வு கருத்துக்கள் வழங்கப்பட்டன.
மாவட்ட அரசாங்க அதிபர் கருத்து தெரிவிக்கும் போது சுற்றுலாத்துறையில் மேம்படுத்தும்நோக்குடன் சுற்றுலாத்துறை சார்ந்த நிறுவனங்களை சட்டரீதியாக பதிவு செய்வதன் ஊடாக அவற்றை ஒழுங்குபடுத்தலை நோக்காக கொண்டு இக்கலந்துரையாடல் ஒழுங்குபடுத்தப்பட்டுள்ளது எனவும் அத்துடன் யாழ் மாவட்டத்தில் காணப்படும் சுற்றுலாத் துறை சேவையை வழங்கும் நிறுவனங்களுள் பதிவுசெய்த நிறுவனங்கள், பதிவு செய்யப்படாத நிறுவனங்கள் தொடர்பாக கூறியதுடன், இலங்கை இந்திய போக்குவரத்து விரிவுபடுத்தல் ஏற்பாடுகள் மேற்கொள்ளப்பட்டுள்ளதாகவும் இதனால் யாழ்.மாவட்ட சுற்றுலாத்துறையை விரிவுபடுத்த வேண்டியுள்ளது எனவும் கூறினார்.
மேலும் யாழ் மாவட்டத்தில் உள்ள அதிகமான சுற்றுலாத்துறைச் சேவையை வழங்கும் நிறுவனங்கள் இலங்கை சுற்றுலா அபிவிருத்தி அதிகார சபையின் கீழ் பதிவுசெய்யப்படவில்லை எனவும் இதனால் இவ் விழிப்புணர்வு கலந்துரையாடல் மூலம் அதிகமாக சுற்றுலாத்துறைச்சேவையை வழங்கும் நிறுவனங்களை பதிவு செய்யக்கூடியதாக இருக்கும் எனவும் தெரிவித்தார்.
இப் பதிவின் மூலம் சுற்றுலாத்துறைச் சேவையை வழங்கும் நிறுவனங்கள் அதிக அனுகூலங்களை பெற்றுக்கொள்ளக்கூடியதாக இருக்கும் எனவும் தெரிவித்தார்.
இக்கலந்துரையாடலில் யாழ் மாவட்ட மேலதிக அரசாங்க அதிபர், வடக்கு மாகாண சுற்றுலா பணியக தலைவர், இலங்கை சுற்றுலா அபிவிருத்தி அதிகார சபையின் பணிப்பாளர், இலங்கை சுற்றுலா அபிவிருத்தி அதிகார சபையின் உதவிப் பணிப்பாளர், வடக்கு மாகாண சுற்றுலா பணியக உதவிப் பணிப்பாளர் மற்றும் சுற்றுலாத்துறையுடன் தொடர்புடைய திணைக்கள அதிகாரிகள் மற்றும் உத்தியோகத்தர்கள், சுற்றுலாத்துறைச் சேவையை வழங்கும் நிறுவனங்களின் பிரதிநிதிகள் ஆகியோர் கலந்து கொண்டனர்.
