தமிழக மீனவர்கள் மீது இலங்கைக் கடற்படையினர் கொடூரமான முறையில் தாக்குதல் நடத்தியுள்ளனர் என்று கூறப்படுகின்றது.
இலங்கைக் கடற்படையினரின் தாக்குதலால் காயமடைந்தனர் என்று கூறப்படும் தமிழக மீனவர்கள் ஐவர் பொறையார் அரசு மருத்துவமனையில் சேர்க்கப்பட்டுள்ளனர்.
இன்று அதிகாலை காரைக்கால் தென் கிழக்கு 44 நாட்டிகல் மைல் தொலைவில் கோடியக்கரைக்கு தென்கிழக்கு கடலில் மீன்பிடித்துக் கொண்டிருந்தபோது அங்கு வந்த இலங்கை கடற்படையினர் மீனவர்களின் வலையை பறித்ததுடன் இரும்பு பைப்பால் கொடூரமாக தாக்கினர் என்று கூறப்படுகின்றது.
அதில் ஐந்து மீனவர்கள் பலத்த காயமடைந்தனர். உடலில் ரத்த கட்டுக்கள் ஏற்பட்டதுடன் ஒரு மீனவருக்கு லேசான எலும்பு முறிவு ஏற்பட்டுள்ளது என்றும் தெரிவிக்கப்படுகின்றது.
நடுக்கடலில் மீனவர்கள் இலங்கை கடற்படையால் தாக்கப்பட்ட சம்பவம் மயிலாடுதுறை மாவட்டத்தில் பெரும் பரபரப்பை ஏற்படுத்தியுள்ளது.
