2026 ஆம் ஆண்டில் தரம் ஒன்றில் சேர்க்கப்படும் மாணவர்களுக்காக வகுப்புகளை ஆரம்பிக்கும் தொடர்பில் கல்வி, உயர்கல்வி மற்றும் தொழில்கல்வி அமைச்சு விசேட அறிவிப்பு ஒன்றை வெளியிட்டுள்ளது.
அதன்படி, அரசாங்க மற்றும் அரச உதவி பெறும்/பெறாத தனியார் பாடசாலைகளில் தரம் ஒன்று வகுப்புகள் 2026 ஜனவரி 20ஆம் திகதி (செவ்வாய்க்கிழமை) தொடங்கப்படும் என தீர்மானிக்கப்பட்டுள்ளது. மேலும், அதற்கு முன்னர் தரம் ஒன்றிற்கு தெரிவு செய்யப்பட்ட மாணவர்கள் அனைவரும் பள்ளியில் சேர்க்கப்பட்டிருக்க வேண்டும் என அமைச்சு அறிவுறுத்தியுள்ளது.
அன்றைய தினம் நடைபெறும் வரவேற்பு நிகழ்வில் பின்வரும் அம்சங்களைச் சேர்த்தல் பொருத்தமாக இருக்கும் எனவும் அறிவிக்கப்பட்டுள்ளது:
-
2026ம் ஆண்டின் தரம் இரண்டாம் மாணவர்களின் பங்கேற்புடன் புதிய மாணவர்களை வரவேற்பது.
-
பெற்றோர் மற்றும் விருந்தினர்களை வரவேற்றல், தேசிய மற்றும் பாடசாலை கொடியேற்றம், தேசிய கீதம் மற்றும் பாடசாலை கீதம் இசைத்தல்.
-
ஆரம்பக் கல்வி மறுசீரமைப்பின் நோக்கம் மற்றும் தரம் ஒன்று புதிய கற்றல் திட்டத்தின் குறிக்கோள்களை பெற்றோருக்கு விளக்குதல்.
-
ஆரம்பப் பிரிவு மாணவர்களின் பங்கேற்புடன் கலை நிகழ்வாக புதிய மாணவர்களை வரவேற்பது.
இந்நிகழ்வு புதிய மாணவர்களுக்கு முன்னுரிமையுடன், பெற்றோர்களுக்கும் மாணவர்களுக்கும் எந்தவித அசௌகரியமும் இல்லாமல் ஒழுங்காக நடத்தப்பட வேண்டும் எனவும் கல்வி அமைச்சு வலியுறுத்தியுள்ளது.
மேலும், இந்நிகழ்வை வெற்றிகரமாக முன்னெடுக்க பாடசாலையின் அனைத்து பிரிவுகள், பாடசாலை அபிவிருத்திச் சங்கம், மற்றும் பழைய மாணவர் சங்கத்தின் ஒத்துழைப்பையும் பெற்றுக்கொள்ள பரிந்துரைக்கப்பட்டுள்ளது.
அத்துடன், புதிய கல்வி மறுசீரமைப்பின் கீழ் தயாரிக்கப்பட்டுள்ள “பிள்ளைகளை இனங்காணல் நிகழ்ச்சித் திட்டம்” (ஆரம்ப பாடசாலைக்கு மகிழ்ச்சிகரமானதோர் ஆரம்பம்) 2026 ஜனவரி 2ஆம் திகதி முதல் 16ஆம் திகதி வரை (அரசு விடுமுறைகள் தவிர்த்து) தேசிய கல்வி நிறுவகம் வழங்கிய வழிகாட்டுதலின்படி நடைமுறைப்படுத்தப்பட வேண்டும் எனவும் அறிவிக்கப்பட்டுள்ளது.
