தமிழகத்திலிருந்து சட்டவிரோதமாக நெடுந்தீவுக்குள் நபர் ஒருவர் நுழைந்த நிலையில், உடனடியாக செயற்பட்ட பாதுகாப்புதுறையினர் அவரை கைது செய்து தனிமைப்படுத்தியுள்ளனர்.
சிறிய தெப்பம் ஒன்றில் தமிழகத்திலிருந்து நெடுந்தீவுக்குள் நுழைந்த குறித்த நபர் வேலைணை 2ம் வட்டாரத்தை சேர்ந்த சுரேஸ்(வயது29) என அடையாளம் காணப்பட்டிருக்கின்றார்.
2004ம் ஆண்டு காலப்பகுதியில் இலங்கையில் இருந்து இந்தியா சென்று தங்கச்சிமடம் பகுதியில் தங்கியிருந்த குறித்த நபர் நேற்று (ஜூலை 02) 12 மணியளவில் நெடுந்தீவின் தெற்கு கடற்பகுதி வழியாக தீவுக்குள் நுழைந்துள்ளார்.
குறித்த நபர் நுழைவதை அவதானித்த மீனவர்கள், கடற்றொழிலாளர் சமாசத்திற்கு தெரிவித்ததை தொடர்ந்து அவர்கள் ஊடாக நெடுந்தீவு பொலிஸாருக்கும், கடற்படையினருக்கும் தெரியப்படுத்தியுள்ளனர்.
இதனையடுத்து குறித்த நபர் கைது செய்யப்பட்டு சுகாதார பிரிவினர் ஊடாக தனிமைப்படுத்தப்பட்டிருக்கின்றார்.
இதேவேளை தமிழகம் ஊடாக சட்டவிரோதமாக நுழயும் நபர்களால் யாழ்.மாவட்டத்தில் மீண்டும் கொரோனா பரவும் அபாயம் உள்ளதாக சுகாதார அமைச்சு எச்சரித்துள்ளமை குறிப்பிடத்தக்கது.
