வவுனியாவில் நடந்த திருட்டுச் சம்பவம் தொடர்பில் முல்லைத்தீவைச் சேர்ந்த ஒருவர் வவுனியா குற்றத் தடுப்புப் பிரிவினரால் நேற்று (ஜனவரி 9) கைது செய்யப்பட்டுள்ளார்.
இந்தத் திருட்டுச் சம்பவம் கடந்த 3ஆம் திகதி நடந்திருந்தது. வவுனியா, திருநாவற்குளம் பகுதியில் உள்ள வீடு ஒன்றில் புகுந்து சுமார் 5 இலட்சம் ரூபா பெறுமதியான நகைகள் திருடப்பட்டன என்று வீட்டு உரிமையாளரால் வவுனியா குற்றத்தடுப்பு பிரிவு பொலிஸில் முறைப்பாடு செய்யப்பட்டிருந்தது.
முறைப்பாட்டுக்கு அமைவாக வவுனியா தலமை பொலிஸ் நிலைய பொறுப்பதிகாரி அவர்களின் வழிகாட்டலில் குற்றத்தடுப்பு பிரிவு பொறுப்பதிகாரி பூ.கஜேந்திரன் தலைமையில் பொலிஸ் சார்ஜன்களான திசாநாயக்கா, திலீப், பொலிஸ் கொன்டபிள்களான உபாலி, தயாளன், தர்மகீர்த்தி ஆகியோரைக் கொண்ட பொஸில் குழு துரித விசாரணைகளை முன்னெடுத்தது.
விசாரணைகளின் அடிப்படையில் முல்லைத்தீவு பகுதியைச் சேர்ந்த 44 வயதுடைய குடும்பஸ்தர் ஒருவர் கைது செய்யப்பட்டுள்ளார்.
அவரிடம் மேற்கொண்ட விசாரணைகளையடுத்து திருடப்பட்டதாக கருத்தப்படும் காப்பு, சங்கிலி போன்ற நகைகளும் மீட்கப்பட்டன. மேலதிக விசாரணைகளின் பின்னர் சந்தேகநபர் நீதிமன்றில் முற்படுத்தப்படுவார் என்று பொலிஸார் தெரிவித்தனர்.
