பறாளாய் முருகன் ஆலயத்தின் அரச மரத்தின் வயதை விஞ்ஞானபூர்வமாக ஆராயவுள்ளதாக ஜனாதிபதி ரணில் விக்கிரமசிங்க தெரிவித்துள்ளாரென ஜனநாயக தமிழ்த் தேசியக் கூட்டணியினர் குறிப்பிட்டனர்.
ஜனாதிபதி ரணில் விக்கிரமசிங்கவை, ஜனநாயக தமிழ்த் தேசியக் கூட்டணியின் இணைத் தலைவர்களான த.சித்தார்த்தன் மற்றும் செல்வம் அடைக்கலநாதன் இருவரும் நாடாளுமன்றத்தில் நேற்றுச் சந்தித்துக் கலந்துரையாடினர்.
இதன்போது பறாளாய் முருகன் ஆலயத்திலுள்ள அரச மரம் சங்கமித்தையால் நடப்பட்டது எனக் குறிப்பிட்டு வர்த்தமானி வெளியிடப்பட்ட விவகாரம் சுட்டிக்காட்டப்பட்டது.
பறாளாய் முருகன் கோவிலில் வரலாறு சுமார் 300 ஆண்டுகளுக்கு உட்பட்டது என குறிப்பிட்டு சம்பவத்தின் பின்னணியையும் வரலாற்று சுருக்கத்தையும் நாடாளுமன்ற உறுப்பினர் த.சித்தார்த்தன் விளக்கமளித்தார்.
இந்த விவகாரத்தில் 2 உண்மைகளில் ஒன்றை ஏற்றுக்கொள்ள வேண்டுமென ஜனநாயக தமிழ்த் தேசியக் கூட்டணியினர் ஜனாதிபதியிடம் கோரினர்.
இந்த மரம் 300 வருடங்கள் பழமையானது என்றால் சங்கமித்தை இலங்கைக்கு 300 வருடங்களின் முன்னரே வந்தார், பௌத்தம் 300 வருடங்கள் மாத்திரமே பழமையானது என்பதை நீங்கள் ஏற்றுக்கொள்ள வேண்டும். அல்லது இந்த மரம் சங்கமித்தை நாட்டிய மரமல்ல என்பதை ஏற்றுக் கொள்ள வேண்டும் என்று குறிப்பிட்டனர்.
பறாளாய் முருகன் கோவிலில் உள்ள அரச மரம் சங்கமித்தை நாட்டிய மரமாக இருக்காது என்பது தனது அபிப்பிராயம் எனக் குறிப்பிட்ட ஜனாதிபதி ,போர்த்துக்கேயர் இலங்கையை ஆண்டபோது நாட்டியிருந்த அரச மரங்களை எல்லாம் அழித்து விட்டதாக தெரிவித்தார்.
மரத்தின் ஆயுள்காலத்தை அளவிடும் பரிசோதனை மேற்கொள்ள உத்தரவிடுவதாக ஜனாதிபதி குறிப்பிட்டார். அந்த பரிசோதனை மேற்கொள்ளப்பட்ட பின்னரா வர்த்தமானி வெளியிடப்பட்டது ?என ஜனாதிபதியிடம் கூட்டணியினர் கேள்வி எழுப்பினர்.
அப்படியான பரிசோதனை எதுவும் மேற்கொள்ளாமல் அது சங்கமித்தை நாட்டிய மரம் என்ற முடிவுக்கு எப்படி தொல்லியல் திணைக்களம் வந்தது? எனவும் கேள்வி எழுப்பினர். இதன் மூலம் அந்த வர்த்தமானி இனவாத நோக்கமுடைய சட்டபூர்வமற்ற வர்த்தமானி என்பது புலப்படுகிறது என்பதையும் சுட்டிக்காட்டினர்.
இதனை ஏற்றுக் கொண்ட ஜனாதிபதி, தொல்லியல் திணைக்களம் எந்த விஞ்ஞானபூர்வ நடைமுறைகளையும் கடைப்பிடிக்காமல் எப்படி வர்த்தமானி வெளியிட்டார்கள் என்பது தொடர்பில் உடனடி விசாரணை நடத்தி அறிக்கை சமர்ப்பிக்க தனது செயலர் சமன் எக்கநாயக்கவுக்கு உத்தரவிட்டுள்ளார்.
