இலங்கை கடற்பரப்பில் அத்துமீறி நுழைந்து மீன்பிடி செயல்களில் ஈடுபட்டதாகக் குற்றச்சாட்டின்படி, இந்த ஆண்டின் முதல் 11 நாட்களில் 18 தமிழக மீனவர்கள் கைது செய்யப்படுவதுடன், அவர்களுடைய 3 படகுகளையும் இலங்கை கடற்படையினர் கைப்பற்றியுள்ளனர்.
நேற்று (ஜனவரி 11) சனிக்கிழமை இரவு, மன்னார் மற்றும் நெடுந்தீவு கடற்பரப்புகளுக்கிடையில் அத்துமீறி நுழைந்து மீன்பிடி செயல்களில் ஈடுபட்டதாகக் கூறி, 8 தமிழக மீனவர்கள் கைது செய்யப்பட்டனர். அவர்களது 2 படகுகளும் இலங்கை கடற்படையினரால் கைப்பற்றப்பட்டன.
கைது செய்யப்பட்ட மீனவர்கள் இரணைதீவுக்கு அழைத்துச் செல்லப்பட்டு, கிளிநொச்சி நீரியல் வளத்துறை அதிகாரிகளின் வழியே நீதிமன்றத்தில் முற்படுத்த நடவடிக்கை எடுக்கப்பட்டுள்ளதோடு, அவர்கள் நீதிமன்ற உத்தரவுப்படி தடுத்து வைக்கப்பட்டுள்ளனர்.
இதற்கு முன்னர், ஜனவரி 8 ஆம் தேதி யாழ்ப்பாணம், காரைநகர் கடற்பரப்பில் அத்துமீறி நுழைந்ததாகக் கூறி, 10 தமிழக மீனவர்கள் கைது செய்யப்பட்டு, ஊர்காவற்றுறை நீதவான் நீதிமன்றத்தில் முற்படுத்தப்பட்டனர். அவர்களுக்கான விளக்கமறியல் உத்தரவு பிறப்பிக்கப்பட்டுள்ளது.
இந்நிலையில், இலங்கை சிறைகளில் தடுத்து வைக்கப்பட்டுள்ள தமிழக மீனவர்களை உடனடியாக விடுவிக்க மத்திய அரசு மற்றும் மாநில அரசு நடவடிக்கை எடுக்க வேண்டும் என இராமேஸ்வரம் பகுதியில் உள்ள மீனவர்கள் வலியுறுத்தியுள்ளனர்.
