கனடாவின் மிக உயரிய இராணுவ கௌரவங்களில் ஒன்றான Order of Military Merit (M.M.M.) விருதை, ஈழத் தமிழரான வாகீசன் மதியாபரணம் பெருமையுடன் பெற்றுள்ளார். இந்த விருதை பெறும் முதல் இலங்கைத் தமிழராக அவர் வரலாற்றில் இடம்பிடித்துள்ளார்.
யாழ்ப்பாணம் இந்துக் கல்லூரியின் பழைய மாணவரான வாகீசன் மதியாபரணம், இலங்கையின் உள்நாட்டுப் போரின் காரணமாக கனடாவுக்குச் சென்றார்.
அந்நாட்டின் இராணுவத்தில் முப்பது வருடங்களுக்கு மேல் சிறப்பாகவும் அர்ப்பணிப்புடனும் பணியாற்றிய அவர், அண்மையில் ஓய்வு பெற்ற நிலையில், அவரது நீண்டகால சமூக சேவை, ஒழுக்கநெறி, தலைமைத்திறன் மற்றும் சிறப்புச் சாதனைகள் மதிக்கப்பட்டு இந்த கௌரவம் வழங்கப்பட்டுள்ளது.
கனடா ஆளுநர் ஜெனரலின் அதிகாரப்பூர்வ இல்லமான Rideau Hall மாளிகையில் நடைபெற்ற சிறப்பு விழாவில், இந்த உயரிய விருது அவரிடம் வழங்கப்பட்டது.
விருதைப் பெற்றபின் தனது உணர்ச்சிகளைப் பகிர்ந்துகொண்ட வாகீசன் மதியாபரணம், நெகிழ்ச்சியுடன் கூறியதாவது:
“இந்த விருது ஒரு பதக்கம் மட்டுமல்ல; என் வாழ்நாள் கனவின் நிறைவேற்றம். ஏதிலியாக வந்த ஒரு தமிழ் இளைஞன் கனடாவுக்கு பணியாற்றி இன்று அதன் உயரிய மரியாதையைப் பெறுவது மிகப் பெருமை.”
அவரின் இந்த வரலாற்றுச் சாதனை, கனடாவில் வாழும் தமிழ் மக்களுக்கும், உலகத் தமிழர்களுக்கும் பெருமையைச் சேர்த்துள்ளது. உலகத்தின் எந்த மூலையிலும் உழைப்பும் அர்ப்பணிப்பும் கொண்ட ஒருவர் சிறக்க முடியும் என்பதை வாகீசன் மதியாபரணத்தின் பயணம் மீண்டும் நிரூபிக்கிறது.