காணி மோசடி வழக்கில் நேற்றுமுன்தினம் (ஏப்ரல் 23) கைதுசெய்யப்பட்ட நெடுந்தீவுப் பிரதேச சபையின் முன்னாள் தவிசாளர் மற்றும் அவரது மோசடிக்கு துணை நின்ற இருவரும் பிணையில் செல்ல அனுமதிக்கப்பட்டுள்ளனர்.
இவர்களை நேற்று ஊர்காவற்றுறை நீதிமன்றில் முற்படுத்திய போது வழங்கு விசாரணைகளை மேற்கொண்ட நீதிவான் பிணையில் செல்ல அனுமதிவழங்கியுள்ளார்.
முறைப்பாட்டாளர் புலம்பெயர் தேசத்தில் இருப்பதால் அவரை எதிர்வரும் 5 ஆம் திகதி நீதிமன்றில் ஆஜராகுமாறு அறிவித்தல் விடுக்கப்பட்டுள்ளது.
தீவகத்தில் முறையற்ற வகையில் பரம்பரைக் காணியை மோசடியான முறையில் தனது பெயருக்கு உரிமம் மாற்றிய நெடுந்தீவுப் பிரதேச சபையின் முன்னாள் தவிசாளரும் அவரது மோசடிக்கு துணை நின்ற முன்னாள் கோட்டக்கல்வி பணிப்பாளர் உள்பட இருவர் பொலிஸாரால் கைது செய்யப்பட்டனர்.
12 சகோதரங்கள் இடையே பிரிவிடல் செய்யப்படவேண்டிய ஆதனத்தை ஒரு சகோதரர் மட்டும் முறையற்ற வகையில் தனது பெயருக்கு மாற்றிய குற்றச்சாட்டில் நெடுந்தீவுப் பிரதேச சபையின் முன்னாள் தவிசாளர் கைது செய்யப்பட்டார் என்று பொலிஸார் கூறினர்.
நெடுந்தீவு 3 ஆம் வட்டாரத்திலுள்ள ஆதனம் 12 சகோதரர்கள் இடையே பிரிவிடல் செய்யப்பட வேண்டும்.எனினும் அந்த ஆதனத்தை சகோதரர் ஒருவர் சட்டத்துக்குப் புறம்பாக தனது பெயருக்கு மாற்றியுள்ளார்.
வெளிநாட்டில் வசிக்கும் மற்றைய சகோதரர் ஒருவர் பங்கு ஆதனம் சட்டத்துக்கு புறம்பாக மோசடியாக விற்பனை செய்துள்ளமையை அறிந்து யாழ்ப்பாணம் பிராந்திய மூத்த பொலிஸ் அத்தியட்சகரின் கீழ் இயங்கும் சிறப்பு குற்ற விசாரணைப் பிரிவில் முறைப்பாடு செய்துள்ளார்.
அதனடிப்படையில் விசாரணைகளை முன்னெடுத்த பொலிஸார், மோசடியாக ஆதனத்தை உரிமம் மாற்றிய நெடுந்தீவு பிரதேச சபையின் முன்னாள் தவிசாளர் நல்லதம்பி சசிகரன் என்பவரை கைது செய்தனர்.
அவரது மோசடியாக முடிக்கப்பட்ட உறுதிக்கு சாட்சிக் கையொப்பமிட்ட முன்னாள் கோட்டக்கல்விப் பணிப்பாளர் மற்றும் ஒருவரும் என இருவர் கைது செய்யப்பட்டனர்.
இந்தக் கைது நடவடிக்கையை யாழ்ப்பாணம் சிறப்புக் குற்றத்தடுப்பு பொலிஸ் பிரிவின் பொறுப்பதிகாரி பொலிஸ் பரிசோதகர் குணறோயன் தலைமையிலான குழுவினர் முன்னெடுத்தனர்.
