யாழ்ப்பாண மாவட்டத்தில் புதிய குடிவரவு மற்றும் குடியகல்வு அலுவலகம் நிறுவப்படும் என அரசாங்கம் தீர்மானித்துள்ளது என்று பொது மக்கள் பாதுகாப்பு மற்றும் பாராளுமன்ற விவகார அமைச்சர் ஆனந்த விஜேபால தெரிவித்தார்.
இன்று (பெப் 08) நடைபெற்ற நிகழ்வில் கலந்துகொண்ட அவர், யாழ்ப்பாணத்தில் உருவாக்கப்படும் புதிய குடிவரவு மற்றும் குடியகல்வு அலுவலகம் 24 மணி நேரமும் செயல்படும் என்று குறிப்பிட்டார்.
மேலும், இவ்வமைப்பிற்கான பணியாளர்களை நியமிப்பதற்கான அமைச்சரவை அனுமதி கிடைத்துள்ளதாகவும் அமைச்சர் தெரிவித்தார்.
“நாங்கள் கடந்த இரண்டு மாதங்கள் மற்றும் 10 நாட்களுக்கு மேலாக பாஸ்போர்ட் தொடர்பான பிரச்சினைகள் குறித்து விவாதித்தோம். இது குறித்து அமைச்சரவையிலும், நிறுவன தலைவர்களுடனும் பேச்சுவார்த்தை நடத்தினோம்.
அதேபோல், நீதித்துறை செயல்முறைகளை விரைவுபடுத்துவதின் முக்கியத்துவம் மற்றும் தற்போதைய பாஸ்போர்ட் தொடர்பான சிக்கல்களை தீர்க்க வேண்டிய அவசியம் குறித்தும் விவாதிக்கப்பட்டது.
இந்த முடிவுகளின் அடிப்படையில், யாழ்ப்பாணத்தில் புதிய குடிவரவு மற்றும் குடியகல்வு அலுவலகம் நிறுவப்படும்.
இதன் செயல்பாட்டிற்கு தேவையான பணியாளர்களை நியமிக்க அமைச்சரவை ஒப்புதல் வழங்கியுள்ளது.
தற்போது, அமைச்சரவை தீர்மானம் பொது சேவை ஆணைக்குழுவிற்கு அனுப்பப்பட்டுள்ளது” என அமைச்சர் தெரிவித்தார்.
