2025 ஆம் ஆண்டில் யாழ்ப்பாணத்தில் பழைய கட்டடங்களை புதுப்பிப்பதற்கான நடவடிக்கைகளை யாழ். மாநகர சபை முன்னெடுத்து வருகிறது. இந்த முயற்சிக்கு எங்களின் முழு ஆதரவையும் வழங்குவோம் என்று வடக்கு மாகாண ஆளுநர் நா. வேதநாயகன் தெரிவித்தார்.
யாழ்ப்பாண மாநகர சபையின் உள்ளூர் அபிவிருத்தி மேம்பாட்டுத் திட்டத்தின் கீழ், 52.5 மில்லியன் ரூபா செலவில் புதுப்பிக்கப்பட்ட பண்ணை மீன் சந்தைக் கட்டடத்தை வடக்கு மாகாண ஆளுநர் கடந்த டிசம்பர் 21 ஆம் தேதி மதியம் திறந்து வைத்தார்.
அந்த நிகழ்வில் ஆளுநர் பேசுகையில், “யாழ்ப்பாணம் ஒருகாலத்தில் தூய்மையான நகரமாக இருந்தது. ஆனால் இன்று பல சவால்களை எதிர்நோக்குகிறது. நகரத்தை மீண்டும் தூய்மையான, அழகான இடமாக மாற்றுவது நம்மில் ஒவ்வொருவரின் பொறுப்பாகும்,” என்று தெரிவித்தார்.
“இந்த மீன் சந்தை மிகுந்த முயற்சியுடன் கட்டப்பட்டுள்ளது. இதை பயன்படுத்தும் விதமே அதன் வெற்றியை நிரூபிக்கும். இது உங்கள் எல்லோருக்குமான சொத்து. இந்த கட்டடத்தை தூய்மையாக பராமரித்து பாதுகாக்கும் பொறுப்பு உங்களின் தலையாய கடமை. நீங்கள் அதைப் பொறுப்புடன் செய்யும் பட்சத்தில், அதிக எண்ணிக்கையிலான நுகர்வோர்கள் உங்களை நாடி வர வாய்ப்பு அதிகரிக்கும்,” என்றும் அவர் கூறினார்.
இந்த நிகழ்வில் யாழ்ப்பாண உள்ளூராட்சி உதவி ஆணையாளர், மாநகர சபை ஆணையாளர், மற்றும் யாழ்ப்பாண பிரதேச செயலர் ஆகியோரும் கலந்து கொண்டனர் என்பது குறிப்பிடத்தக்கது.
