வவுனியா நகர சபையின் முதல்வர் சுந்தரலிங்கம் காண்டீபன் மற்றும் துணை முதல்வர் பரமேஸ்வரன் கார்த்தீபன் தங்கள் பதவிகளில் செயற்படுவதற்கு தடை விதிக்கும் இடைக்கால உத்தரவை மேன்முறையீட்டு நீதிமன்றம் நேற்று (ஒக். 21) பிறப்பித்துள்ளது.
வவுனியா நகர சபை உறுப்பினர்கள் கந்தையா விஜயகுமார் மற்றும் சிவசுப்பிரமணியம் பிரேமதாஸ் ஆகியோர் தாக்கல் செய்த ரிட் மனுவை பரிசீலித்த பின்னரே இந்த உத்தரவு பிறப்பிக்கப்பட்டது.
நீதியரசர்கள் ரொஹாந்த அபேசூரிய மற்றும் பிரியந்த பெர்னாண்டோ தலைமையிலான மேன்முறையீட்டு நீதிமன்ற அமர்வு இவ்வுத்தரவை வழங்கியது.
இந்த இடைக்காலத் தடை உத்தரவு, மனுவின் விசாரணை நிறைவடையும் வரை அமலில் இருக்கும் என நீதிமன்றம் தெரிவித்துள்ளது. மேலும், மனு மீதான மேலதிக விசாரணை நவம்பர் 19ஆம் திகதிக்கு ஒத்திவைக்கப்பட்டுள்ளது.
சட்டத்தரணி மஞ்சுள பாலசூரிய ஊடாக தாக்கல் செய்யப்பட்ட மனுவில், வவுனியா நகர சபை முதல்வர் 11 வாக்குகள் பெற்று தெரிவாகியிருந்தாலும், மற்ற போட்டியாளர் 10 வாக்குகள் பெற்றிருந்தார் என குறிப்பிடப்பட்டுள்ளது. அதேபோல, துணை முதல்வர் பதவிக்கு தெரிவானவரும் 11 வாக்குகள் பெற்றதாகவும், அவருடன் போட்டியிட்டவர் 10 வாக்குகள் பெற்றதாகவும் மனுவில் சுட்டிக்காட்டப்பட்டுள்ளது.
மேலும், துணை முதல்வராக தெரிவானவர் நகர சபையின் நிர்வாக எல்லைக்கு வெளியே வசிப்பவர் என்பதையும் மனுதாரர்கள் குற்றம் சாட்டியுள்ளனர்.
முதல்வர் மற்றும் துணை முதல்வர் இருவருக்கும் அந்தப் பதவிகளை வகிக்க போதிய சட்டப்பூர்வ தகுதி இல்லையெனவும், அவர்களின் தெரிவு சட்டத்திற்கு முரணானது எனவும் மனுவில் குறிப்பிடப்பட்டுள்ளது.
இதனிடையே, அவர்களின் பதவிகளை செல்லுபடியாகாது என அறிவித்து ரிட் ஆணையை வழங்குமாறும் மனுதாரர்கள் கோரியுள்ளனர்.
மனுதாரர்கள் சார்பில் சட்டத்தரணி மஞ்சுள பாலசூரியவின் ஆலோசனையின் பேரில் ஜனாதிபதி சட்டத்தரணி சாலிய பீரிஸ் தலைமையிலான சட்டத்தரணிகள் குழு நீதிமன்றத்தில் ஆஜராகியிருந்தது.