கடந்த மாதம் அமுலுக்கு வந்த அமெரிக்கா மத்தியஸ்தம் செய்த போர்நிறுத்தத்தை மிகப்பெரிய அளவில் மீறும் சம்பவங்களில் ஒன்றாக, காசா பகுதியில் இஸ்ரேலின் தாக்குதல்களில் குறைந்தபட்சம் 28 பாலஸ்தீனர்கள் கொல்லப்பட்டுள்ளதாக மருத்துவ வட்டாரங்கள் தெரிவித்துள்ளன.
புதன்கிழமை (நவம்பர்19) இஸ்ரேலிய குண்டுவீச்சில் குறைந்தபட்சம் 77 பாலஸ்தீனர்கள் காயமடைந்துள்ளனர் என்று காசாவில் உள்ள பாலஸ்தீன சுகாதார அமைச்சகம் ஆரம்பக்கட்டத் தகவலில் தெரிவித்துள்ளது.
ஐ.நா. பாதுகாப்பு கவுன்சில் திங்கட்கிழமை ஒரு தீர்மானத்தை நிறைவேற்றியது. இது, அக்டோபர் 10-ஆம் தேதி அமுலுக்கு வந்த பலவீனமான போர்நிறுத்தத்தை பலப்படுத்த முயன்றது. டிரம்ப் இந்தத் தீர்மானத்தை “உண்மையான வரலாற்று முக்கியத்துவம் வாய்ந்த கணம்” என்று பாராட்டினார்.
பலஸ்தீன அரசு அமைந்தாலன்றி தங்கள் ஆயுதங்களைக் கைவிட மாட்டோம் என்று ஹமாஸ் அறிக்கை ஒன்று மீண்டும் வலியுறுத்தியதுடன், இஸ்ரேலுக்கு எதிரான தங்கள் போராட்டம் நியாயமான “எதிர்ப்பு” என்று குறிப்பிட்டுள்ளது.
இஸ்ரேலின் ஐ.நா. தூதுவர் ஆயுதக் களைவின் முக்கியத்துவத்தை வலியுறுத்தி, ஹமாஸ் இனிமேல் “ஒரு அச்சுறுத்தலாக” இல்லையென்றால் மட்டுமே தன் நாடு “நிறுத்தவோ அல்லது தளர்த்தவோ” செய்யும் என்று கூறினார்.
சுமார் 1,200 பேர் கொல்லப்பட்ட மற்றும் 251 பேர் பிணைக் கைதிகளாகக் கொண்டு செல்லப்பட்ட ஹமாஸ் தலைமையிலான தாக்குதலுக்குப் பதிலடியாக, அக்டோபர் 7, 2023 அன்று இஸ்ரேலிய இராணுவம் காசாவில் தாக்குதலைத் தொடங்கியது.
அந்தப் பிரதேசத்தின் ஹமாஸ் நிர்வாகத்தின் சுகாதார அமைச்சகத்தின்படி, அதன்பிறகு காசாவில் இஸ்ரேலியத் தாக்குதல்களில் போர்நிறுத்தத்தின் போது 280 பேர் உட்பட குறைந்தபட்சம் 69,500 பேர் கொல்லப்பட்டுள்ளனர்.