23வது ஆசிய விளையாட்டுப் போட்டியில் இலங்கை சார்பில் 01 தங்கம் மற்றும் 02 வெள்ளிப் பதக்கத்தினை வென்று சாதனை படைத்த யாழ் மாவட்ட விளையாட்டு வீரா் செல்வராசா ரமணன் அவர்களை நேற்றையதினம் (நவம்பர்13) கௌரவிக்கப்பட்டார்.
யாழ் அரசாங்க அதிபர் அலுவலகத்தில் நடைபெற்ற கெளரவிப்பு நிகழ்வில் அரசாங்க அதிபர் ம. பிரதீபன் அவர்கள் பதக்கம் வென்ற வீரருக்கு பொன்னடை போர்த்தி மலர்மாலையிட்டு கௌரவித்தார்.
23வது ஆசிய விளையாட்டுப் போட்டியில் 3000 விளையாட்டு வீர வீராங்கனைகள் பங்குபற்றியிருந்ததுடன் இலங்கை சார்பில் 250 வீர வீராங்கனைகள் பங்குபற்றிய போது அதில் யாழ்ப்பாணத்தைச் சேர்ந்த ஒரேயொரு தமிழராக செல்வராசா ரமணன் பங்குபற்றி உயரம்பாய்தலில் தங்கப்பதக்கத்தை பெற்று சாதனை படைத்தமையுடன் முப்பாய்ச்சல் மற்றும் கோலூன்றிப்பாய்தல் போட்டிகளிலும் வெள்ளிப்பதக்கத்தை பெற்றுக்கொண்டார்.
இக் கௌரவிப்பு நிகழ்வில் மேலதிக அரசாங்க அதிபர் கே. சிவகரன் , மேலதிக அரசாங்க அதிபர் (காணி) பா.ஜெயகரன் பிரதம கணக்காளர் எஸ். கிருபாகரன் உள்ளிட்ட பதவிநிலை உத்தியோகத்தர்கள் கலந்து கொண்டதுடன் ஸ்புட்னிக் விளையாட்டுக்கழக
வீரர்கள் மற்றும் மாவட்ட செயலக விளையாட்டு உத்தியோகத்தர்களும் கலந்து கொண்டனர்.